Брюссельдегі кездесуде сөйлеген Тоқаев Қазақстан мен Еуропалық Одақ арасындағы қарым-қатынастың стратегиялық сипатын атап өтті. Оның айтуынша, Еуропалық Одаққа республиканың барлық тікелей шетелдік инвестицияларының жартысына жуығы тиесілі.
Өткен жылы екіжақты тауар айналымы 45 млрд доллардан асты. Қазақстанда 4000-ға жуық еуропалық компания жұмыс істейді, олардың қатарында Airbus, Polpharma Group, Air Liquide Group, Škoda Group және Alstom бар. Жаңа серіктестер қатарына Roca Group, Inditex, Maersk, Dewulf және Damen Shipyards Group қосылды.
Брюссельге сапар
Тоқаев Брюссельге ресми сапармен келген күні Бельгия премьер-министрі Барт де Вевермен, Еуропалық кеңестің президенті Антониу Коштамен және Еурокомиссия басшысы Урсула фон дер Ляйенмен келіссөздер жүргізді.
Тараптар Қазақстан мен Еуропалық Одақ арасындағы қарым-қатынас тарихтағы ең жоғары деңгейде екенін атап өтті. Тоқаев көлік-логистика саласындағы ынтымақтастық мәселелеріне бөлек тоқталды.
Еуропалық кеңестің президенті Қазақстанның географиялық орналасуы, тарихы мен мәдениеті оған Еуропа мен Азия арасындағы көпір болуға мүмкіндік беретінін айтты. Сапар қорытындысы бойынша Қазақстан мен Еуропалық Одақ бірлескен мәлімдеме қабылдады.
ЮНКТАД-тың соңғы баяндамасына сәйкес, Қазақстан Орталық Азияда тартылған тікелей шетелдік инвестиция көлемі бойынша көш бастап тұр және теңізге шыға алмайтын посткеңестік елдер мен дамушы мемлекеттер арасында өз позициясын сақтап отыр.